كليب طازة كليب طازة كليب طازة
كلمات طازة كلمات طازة كلمات طازة
غناء الفنان عاصم إمام ومن تلحين صهيب شكرى ومن كلمات هديل عبد السلام
أنا اللى هتفت سلمية
لا أنا صايع ولا بايع
سنين عمرى اللى باقية بلاش
ولا حابب أشوف أمى قلقها عليا مبيهداش
ولا عايز أشوفها شايله الهم
ولا تبكى لو تشوف الدم
ولما تتسأل عنى تقول ده ضنايا راح ولا جاش
أنا اللى هتفت سلمية
ولا كان نفسى أشم الغاز
ولا أمسك طوة فى ايديا
ولا خرطوشة تحرقنى
أنا اللى هتفت سلمية
ومكنش فى بالى ضرب النار
ولا أنضرب برصاص
ولا ان عنيا تبقى نشان
لظابط مفترى وقناص
ومات أيامها صاحبى فؤاد
ومات خالد ومات رامى
وراحت عين قريبى هشام
وعدى الشهر بعد الشهر
وفاتوا عليا زى الدهر
ودم الشهدا يفزعنى
ويقلق راحتى كل ما أنام
ساعتها لقتنى متكتف
وقلت لابد أروح أهتف
رجعت هتفت سلمية
وقلت الدم مش للبيع
بورقة بعشرة أو مية
فى ايدى ايه غير إنى أهتف
فضلت أهتف فضلت أهتف
وقلت يا ناس ده أنا اللى هتفت سلمية
قالولى لأ ونكرونى
وشوفت الدم من تانى
وعاد المشهد التانى
وده كان يوم ممات مينا
عشان مقبلش تانى الذل
وراح يهتف
وزادت قايمة الشهدا عدد م الناس
فى منهم صابتوا رصاصة أو اللى انداس
وزادوا الحزن والقهرة
وعادوا الكرة ميت مرة
وسال الدم من تانى على جبينه
وغرق عمته الحرة
ومن تانى عشان خاطرى يسيل الدم يا طاهرة
وبعد ده كله
أنا اللى هتفت سلمية
ويسقط كل من خانوا
ويسقط كل من باعوا
ويسقط كل من وقفوا فى وش جيل بيتحرر
ويسقط كل من ضربوا
ويسقط كل من قتلوا
ويسقط كل من شطبوا
سطور فى تاريخ بيتسطر
ومن تانى رخص دمى
وسال فى شوارع التحرير
معدش بينفع التبرير
ورجعوا وقالوا تستاهل
لكن عارفين ؟
أنا أستاهل
عشان أنا كنت متساهل
ولجل يكون فى معلومكم مفيش حرية بالساهل
ومهما يسيحوا فى دمى إرادتى مش هتتكسر
ويسقط كل من خانوا
ويسقط كل من باعوا
ويسقط كل من وقفوا فى وش جيل بيتحرر
ويسقط كل من ضربوا
ويسقط كل من قتلوا
ويسقط كل من شطبوا
سطور فى تاريخ بيتسطر
