مفيش وطن مكتوب على بابه شروط
ولا فيش وطن بيخيرك إزاى تموت
إزاى أموت؟!!
طاب قوللى قابله إزاى أعيش
هل يا وطن دا من مفيش؟
وطن من غير مواطن
سكان من غير مساكن
غلب الغلبان ما هامم
والشارع يامه لامم
واللمه على مفيش
البنت الحلوه دايبه
الواد عامل مطنش
الواد أول ماداب
البنت قالتله فركش
فرفش ونعنش يا وطن...
فرفش ونعنش
أدى شبابك يا وطن
رحال بيطفش
وبيستخبى جوه تُمانية حشيش
خوفه على نفسه...
مش قد خوفه من الشاويش
هل يا وطن دا من مفيش؟
باعوك علن ..وإنت الوطن
ومهما كان إللى إنقبض
دا مش تمن
أرضك باعوها
إبنك باعوه
صوتك خدوه وإدوه لمين
مالكش إلا تقول أمين
هو إنت مين؟؟
وطن إللى باعك
ولا إللى مش عارف يعيش
هل يا وطن دا من مفيش؟
وطن ومتسلسل من القدم للراس
وطن ومتفصل على قد ناس ناس
ذليله متأصل وأصيله منداس
وطن وإسمه وطن بس إللى فيه مش ناس
شايفينه عارى البدن لكن مفيش إحساس
لو يوم بتبنى سكن لازم يكونله أساس
وإنتو بتبنو الوطن على كام طلقة رصاص
والكام طلقة رصاص بردو ما موتونيش
هل يا وطن دا من مفيش؟
لما أسألك تقوللى فى
إياك تقول لا من مفيش
دايما مفيش شئ من مفيش
د.على جلال كاشف
تصميم سمر إبراهيم
